Nola elikatu gure adinaren arabera / Nerabezaroa: 12-18 urte
Sarrera
Nerabezaroan aldaketa emozional, sozial eta fisiologiko garrantzitsuak gertatzen dira (pubertaroko luzaketa, sexu-heltzea…). Azken horietan, elikadurak garrantzi berezia hartzen du, aldaketa horiei aurre egiteko nutrizio-eskakizunak oso handiak direlako eta energia eta mantenugaien ekarpen egokia ziurtatu behar delako. Gainera, garrantzitsua da osasun-arazoak eragin ditzaketen nutrizio-defizitak saihestea.
Nerabearen elikadurari aurre egiteko, dieta nahikoa eta orekatua bermatzen duten elikagaiak aukeratu behar dira, eta otorduak antolatu eta egituratu behar dira egunean zehar. Garrantzitsua da nerabeei eragin diezaieketen eta dieta aldatu behar zaien egoerak ezagutzea (aparteko jarduera fisikoa, elikadura-jokabide desegokiak, gaixotasun akutuak edo kronikoak, etab.)
Nerabezaroa bizitzako etapa zail bat da, haur izateari utzi eta heldu izaten hastearen arteko trantsizioa baita. Garai horretan, zailtasunak izaten dira nutrizio egokirako, nerabearen nortasun independenteagatik eta gizarte-elikadurako ereduengatik; izan ere, batzuetan, ohiko otorduak alboratu eta “mokaduak” eta janari lasterrak hartzen dira etxetik kanpo.
Bestalde, azpimarratzekoa da nerabeek beren gorputz-irudiari buruz duten kezka. Izan ere, sarritan, edertasun-eredu ideal batera hurbiltzeko dieta murriztaileak egitea baldintzatzen du, unean uneko gizarte-ereduek eraginda, eta elikadura-jokabidearen nahasmendu larriak eragin ditzake horrek (anorexia, bulimia eta bigorexia). Hori dela eta, oso garrantzitsua da familiak seme-alabei beren gorputzarekiko errespetua eta maitasuna transmititzen jakitea, eta, aldi berean, elikadura-ohitura egokiak izatea.
