Nola elikatu gure adinaren arabera / Heldu gaztea: 18-40 urte

Bizitzako etapa honetan ez dago beste garai batzuetan (haurtzaroan edo nerabezaroan, adibidez) izaten diren energia- eta nutrizio-eskaera handirik. Behar horiek nabarmen txikiagoak dira gorputz-pisuari dagokionez, eta, besteak beste, faktore hauen mende daude: adina, sexua, gorpuzkera (sendoa, ertaina, argala) eta jarduera fisikoaren maila.

Hezur-masa: pubertaroaren hasieran eta nerabezaroaren amaierara arte gertatzen da hezur-masaren hazkunderik azkarrena. Une horretatik eta 30 urte bete arte, gutxi gorabehera, hezurra finkatu egiten da. Elikaduraren bidez kaltzioa egoki hartzea faktore garrantzitsua izango da bizitzan zehar osteoporosia prebenitzeko.